Geessie woonde op’n boerderij, zo staark as’n beer en ’t bekje nooit stil, heur man hail rustig van netuur haar veul bestuursboantjes, zo ook veurzitter van de dörs verainiging.
In ’t veurjoar wer in ’t huus van de veurzitter de bestuursvergoadering hol’n, soamen mit de massienist, zo omstreeks April, den wer besprook’n over de onderhold en of der nog wat gebeur’n mos . Geessie schonk den de kovvie in, moar har of en tou heur bekje der ook tuss’n, den zee heur man,Geessie hol die stil, het duurde eem of Geessie haar ’t bekje alweer oop’n, inains zee de veurzitter Geessie hol die de bek. ’N Moand loater volgde den de algemaine vergoadering in’t Cafe, doar wer den besprook’n woar de dörsmesien dit joar begon. De dörsmesien wer mit peerd’n van boer noar boer brocht, ook wer soms de zolderchuut gebruukt, den kwam de dörskast veur op schip de paars er achter in stoommobiel in’t mid’n op draai. Zo ook kwam dörs-mesien bie Geessie op boerderij te dörsen, mor ja het vroor dat knapte en ’s-Oavends wer ‘t woater van de stoommobiel oaftapt, mor s’morgens mos de stoommobiel weer vol woater, pompen waren bevroor’n, dat Geessie sprong om 6 uur uut bêrre om een bit te kap’m in ’t daip toun ’t bit groot genog was gebeurde het Geessie vol op wale glee uut en toun tot ’t lief tou in ’t gat dei ze net hakt haar. Dörsmesien volk kwam en heurde dat Geessie tot ’t lief tou in daip was gleed’n. Geessie wui older heur man was vroug overleed’n doarom kwam zeun op boerderij en Geessie kocht n’burgerhuus in ’t dorp. En eerste wat Geessie wilde mit heur nije huus, ik wil ook hounder hebb’n dat moute’n broene of dot’n wees’n gain leghorns dei benn’n mie veuls te wild. De kinders hebb’n heur n’hok timmerd. En Geessie kocht’n koppel broene kukens, mor achter in de toene was gain gras veur de hounder doarom noar de timmerman veur ’n laange plaanke want achter de toene was ’n braide sloot woar de plaanke over mos want doar was gras eerst ging het nait te best mit de hounder over de plaank mor alles is te leer’n zelfs veur hounder. Bie zummerdag wol Geessie de gewaz’n zain, kinder kwaam’n mit braifke den mos ze ophoald worn mit peerd en wupkoare en n’trapke mit en Geessie op wupkoare om onderweg de gewaz’n bekiek’n. Geessie zag hail wat onkruut stoan, zoas mell’n röggebloum’n ze kwam op boerderij aan, mor eerst mos ze de stoof onder de vout’n hebb’n. Geessie heur huus wer te groot ze stelde veur aan de kinder om de veurste gedailte te verhuur’n der wer wat vertimmerd en er kwam een jong poar in ’n politie dei net trouwd was, dat paasde Geessie goud. Mor aal wat toene was, moz’n bloum’n kom’n, zo ook veur thuus mor ja op zekere dag zag Geessie dat er bie de ofstap van de stoup ze heur bloum’n knikt haar’n. Toun het Geessie in ’t donker stokjes in de grond stook’n bie de bloum’n mit de schaarpe punt omhoog, toun ging’n heur zied’n kouz’n er kapot van. Mor Geessie is wel old word’n.

H. Kooi